Dueroko Erribera

Dueroko Erribera eskualdea Ribera del Duero eskualdea
Herrialdea	Espainia
Autonomia erkidegoa	Gaztela eta Leon
Probintzia	Burgos
	Eskualdearen mapa, udalerrika zatiturik.

Dueroko Erribera edo Ribera del Duero^[1] eskualdea Duero ibaiaren arroan kokatzen da, Burgosko probintziaren (Gaztela eta Leon) hegoaldean, Aranda de Dueroko barruti judizialean. Esgueva ibarra Dueroko Erriberako azpieskualde bat da.

Hidrografia eta Orografia

Duero ibaiak uzten duen paisaia laua da batik bat, altuera mailan alde handiegirik agerian utzi barik. Paisaiak kareharriz eta hareharriz osatutako eremuez, landazabalen hondar-lurrez eta ibaiertzetako lokatz buztintsuez osatuta daude.

Hauek dira Dueroko Erriberatik igarotzen diren ibaiak:

Arandilla ibaia, Dueroren ibaiadarra
Río Bañuelos ibaia, Dueroren ibaiadarra
Duero ibaia
Río Esgueva ibaia, Pisuerga ibaiaren ibaiadarra, eta ondorioz Dueroren ibaiadarra
Río Gromejón ibaia, Dueroren ibaiadarra
Riaza ibaia, Dueroren ibaiadarra

Ekonomia

Dueroko Erriberan nekazaritza da sektorerik garrantzitsuena. Gehienbat zerealak, erremolatxak eta mahatsondoak lantzen dira. Abeltzaintzari dagokionez, ardiak larreratzen dira. Oso platerkada ezaguna da hango arkume errea.

Sektore industrial garrantzitsua duen hiri bakarra Aranda de Duero da, Pascual esnekiak, Glaxo eta Michelin lantegiekin.

Ribera del Duero jatorrizko deitura

Eskualde honetan Ribera del Duero jatorrizko deitura izenpean dituzten ardoak ekoizten dira. Hala ere, Soria, Segovia, Valladolid eta Burgosko probintzietara zabaltzen da. Batzorde arautzailearen egoitza Roan dago.