Botanikoko Akordioa

Mota

akordio

Data

2015eko ekainaren 11

Herrialdea

Espainia

Sinatzailea

Ximo Puig
Zein ordezkatzen du: Valentziar Herriko Alderdi Sozialista
Mònica Oltra
Zein ordezkatzen du: Coalició Compromís
Antonio Montiel ^(en)

Zein ordezkatzen du: Podemos Valencia ^(en)

Rubén Martínez Dalmau
Zein ordezkatzen du: Unides: Podem - Esquerra Unida ^(en)

(2019)

Osatuta

Valentziar Herriko Alderdi Sozialista
Coalició Compromís
Podemos Valencia ^(en) (2015 – 2019)
Unides: Podem - Esquerra Unida ^(en) (2019 – )

Lan osoa eskuragarri

gvaoberta.gva.es…

Botanikoaren Akordioa (valentzieraz: Acord del Botànic) 2015eko ekainaren 11n Valentziar Herriko Alderdi Sozialistak (PSPV-PSOE) eta Coalició Compromísek sinatu zuten Valentziar Herriaren gobernu-hitzarmena izan zen.^[1] Akordioak izen hori zuen Valentziako Unibertsitatearen lorategi botanikoan gauzatu zelako. Hasiera batean Ahal Duguren (Podem) kanpoko babesa bazuen ere, hitzarmena berritu zenean 2019ko Valentziako Gorteetako hauteskundeen ondoren, alderdi honek ere parte hartu zuen bertan. Bigarren adostasun horrek II Botanikoaren izena (Botànic II) hartu zuen.^[2]^[3]

I. Botanikoa

2015eko akordioak bost puntu nagusi zituen: «pertsonen babesa», «eraberritze demokratikoa eta ustelkeriaren aurkako borroka», «pertsonentzat gobernatzea», «ekoizpen-eredu berria eta bidezko finantzaketa» eta «herritarren auditoretza». Haren sinadurari esker, Ximo Puig Valentziako Generalitateko lehendakari izendatu zuten. Gainera, dokumentua gaztelaniaz zein valentzieraz argitaratu zen.^[4] Itunak amaiera eman zien Alderdi Popularrak Valentziako Herrian etenik gabe bi hamarkadatan zuzendutako gobernuei.^[5] Aurrerago, akordioa berritu egin zen, 2017ko urtarrilaren 12an, Valentziako Herriaren ekonomia hobetzearen bidean.^[6] Horrez gain, Ahal Duguren ekimenez eguneratu zen berriro 2017ko abenduan.^[5]

II. Botanikoa

2019ko Valentziako Gorteetako Hauteskundeen emaitzak medio, gobernuaren berrantolaketa eta sendotzea beharrezkoa zela argi geratu zen. Hautes-emaitzei erreparatuta, alderdi sozialista egonkortu bazen ere, ezkerrak behera egin zuen. Beraz, gehiengo absolutua bermatzeko, eta ez soilik aurreko legealdiko gehiengo sinplea, hiru alderdiek parte hartu behar zuten. Hau da, sozialistekin eta Compromísekoekin batera Elkarrekin Ahal Duguk sinatu zuen hitzarmena. Izan ere, hauteskunde hauetan lehenengoz Ahal Dugu Valentziar Herriko Ezker Batuarekin joan zen koalizioan. Guztira, hiru alderdi hauek 52 aulki zituzten (50n behar dira gehiengo absoluturako) legebiltzarrean. ^[7]

Alderdi horien ordezkari nagusiak, Ximo Puig, Mónica Oltra eta Rubén Martínez Dalmau, 2019ko ekainaren 12an bildu ziren Alacanteko Santa Barbarako gazteluan. Azkenik, Valentziako Herriko X. Legealdian martxan jarriko zen koalizio-gobernu hitzarmena sinatu zuten.^[8] Akordioaren berrezarpenean sei ardatz nagusi finkatu ziren: «trantsizio ekologikoa eta larrialdi klimatikoaren aurkako borroka», «feminismoa, aniztasuna eta tratu-berdintasuna», «pertsonak babesten eta zaintzen jarraitzeko zerbitzu publikoak», «enplegua, ekoizpen-eredua eta berrikuntza», «kalitate demokratikoa eta gobernu ona» eta «fiskalitate progresiboa, bidezko finantzaketa eta ardura valentziarrak».^[9] Gainera, berrespen horri esker Ximo Puig Valentziako Generalitateko lehendakari izendatu zuten berriro.^[10]

Erreferentziak

↑ Acuerdo del Botànic. .
↑ Fernández, Héctor. (2020). «Diez meses de Botánico II en Alicante» El Mundo.
↑ La izquierda cierra ‘in extremis’ un pacto de Gobierno valenciano. 13 de junio de 2019.
↑ Cuquerella, Toni. «PSOE, Compromís y Podemos firman un acuerdo de Gobierno progresista para la Generalitat Valenciana» eldiario.es.
↑ ^a ^b Beltran, Adolf. «El Pacto del Botánico, un éxito del que nadie quiere desmarcarse» eldiario.es.
↑ Serra, Maria Josep. (12 de enero de 2017). «Puig, Oltra y Montiel firman la ampliación del Acuerdo del Botánico» El País.
↑ «La izquierda da por hecho un nuevo pacto del Botánico con un PSOE fortalecido» eldiario.es.
↑ «Puig, Oltra y Dalmau firman el pacto del Botànic II en el castillo de Santa Bárbara» cadenaser.com.
↑ «Acord del Botànic 2. Acord per un govern valencià de progrés» compromis.net.
↑ «¿Cuál es la estructura institucional del nuevo Botànic 2?» lavanguardia.com.